Skip to content

英倫 10 不慣

嚟咗英國六個月左右,都差唔多叫做 settle down 好晒,慢慢生活都重回正軌。但係始終呢度唔係香港,有啲嘢總係覺得差啲啲,有乜嘢覺得到而家仲未習慣或者適應,睇睇下面就知道。

  1. 英文 — 死症,真係需要時間去適應。耳仔其實已經習慣聽英文多過廣東話,但係聽、說能力真係差,幾時先可以搞得掂。而家日日都會睇幾篇英文 news 學多啲生字,有個科技網站 techradar 仲可以用聲音讀文章添,咁就可以試下自己聽唔聽得明白。點解唔用電影嚟學習聆聽嘅能力? 電影啲讀白實在太快,而且好多口音,真係幾難聽。聽呢個網站就可以不停咁 repeat 去聽,希望下半年我可以有進步啦!
  2. 奶茶 — 香港日日都飲一杯先返工,而家只可以用即沖奶茶粉,但點都係唔及香港茶餐廳嘅好飲。好多人話自己煲,呢個就真係要啲時間去研究下點做,上網都睇咗好多篇教人沖茶,茶葉可以去 M&S 買,基本上要沖嘅材料都可以英國買,不過最煩係要自己去 try,要搵日去沖幾杯,睇下點沖法可以符合到自己口味。 近排老婆試咗沖幾次,個味好接近,而家唔駛日日飲即沖奶茶粉。 不過都希望下半年我自己可以沖到杯茶味濃又夠滑嘅奶茶畀自己。
  3. 飲食 — 呢度出街食嘢好貴,再加埋佢哋食嘅嘢來來去去都係 pizza,burger、fish & chip 等等…… 如果你要食中餐,真係要自己煮。酒樓呢邊都有,都有點心、炒粉麪飯。反而韓國餐呢度都幾多選擇,質素都唔錯。當然你有錢,應該可以出去搵到好多好嘢食嘅。
  4. 揸車 — 呢度好多路都係揸 20 miles,真係由揸第一日開始已經覺得速度好慢,慢到想瞓。到而家仲未慣,成日會唔小心超速。好彩嘅係未試過抄牌影快相。 呢度揸車有樣嘢要習慣下,就係要做一個禮讓司機,有行人等過馬路,你就一定要讓行人先。十字路口要出車,只要睇右邊有無車,因為左邊車一定要讓你。
  5. 購物 — 香港習慣成日出街 windows shopping,就算上網買嘢都要去下實體店摸過睇過先會再上返去網買,尤其買波鞋,隻隻款都可能唔同腳型,唔試過上腳你點可以知道啱唔啱自己。又例如買 sofa 都要去坐下先啦,但呢度好多時上網睇完就要落單買,啲貨嚟到先知究竟質素點樣。好嘅係,呢度你唔滿意可以退貨 refund,但係咁樣又退又再揀,都嘥咗好多時間。
  6. 小昆蟲 — 香港見得多小強 (曱甴),呢度就見得多蜘蛛。可能香港住得耐,見到小強都無乜嘢,佢又唔會騷擾到我,反而蜘蛛就比較麻煩。屋企無論前後園都有大量蜘蛛網,你呢頭清咗,過一陣又出返晒嚟。有時見到架車都有,甚至連車裡面都有,真係幾討厭。但係英國人好似無乜嘢咁,你有時見到佢哋架車成架都係蜘蛛網,佢哋都唔會理,照揸出街,真心佩服。
  7. 落雨 — 英國天氣真係好怪,但又唔係好似啲人所講咁,成日會灰灰暗暗,暫時嚟講都覺得天朗氣清,唔會好似香港咁濕咁熱咁凍。香港人錫車出晒名,一個星期總會洗一次車,污糟少少就洗。不過呢度就比較麻煩,因為呢度隨時落一陣雨之後又會出猛太陽。其實對我嚟講都無問題,最大問題係呢度嘅雨帶有黃泥,一落少少你架車就會一點點黃色泥印,睇落就會好污糟。 但係好多英國人都唔會點洗車,架車真係好鬼邋遢。 自問真係頂唔住,一見到咁嘅情況又要洗車。
  8. 倒垃圾 — 垃圾分類唔難,只係習慣咗香港模式,每日可以拎啲垃圾去垃圾站/門口就 ok,自然有人拎清垃圾。 英國呢度係定時定候每星期先收垃圾,有時一覺唔覺意唔記得拎出門口,咁就弊傢伙。又要等多兩個星期先再收垃圾,尤其係膠樽膠盒,一個星期唔清已經好煩,miss 咗一次,要再等多兩個星期,你唔搵定兩三個大箱嚟裝嘅話,你啲回收膠就會放到後園周地都係,但屋企邊有咁多箱。
  9. 英鎊 — 習慣咗用港幣嚟做結算,成日都用唔慣英鎊,究竟係平定貴呢? 兌返港紙就覺得貴,但係其實英國嚟講又算平。要快啲適應一下。 遇到只收現金嘅舖頭,每次都要睇得好清楚,真係好難分 £1、£2、50P 呢啲散紙,每次都要睇一大餐。
  10. 浴缸門 – 呢度嘅設計真係好得意。香港會裝浴門或者用浴簾全覆蓋,避免沖涼時啲水射晒出嚟。但係呢度嘅浴缸門只得半邊,即係你一唔小心開水開得大得滯,你會射到出去坐厠或者整到成地濕晒。 真心唔明點解只係整一半,莫非鬼佬沖涼係坐喺度嘅?

吓?我多投訴? 唔係投訴,係唔慣啫。 話晒生活咗喺香港幾十年,突然嚟到呢個國家,當然會有啲唔適應,好正常嘅。 呢啲唔慣係咪唔可以克服? 我覺得再住多排都應該會習慣,遲下可能返香港時會有香港 10 不慣,哈哈哈。

封面圖片取材自 shopee.tw

Published in英倫生活談天說地

Be First to Comment

Leave a Reply

This site uses Akismet to reduce spam. Learn how your comment data is processed.