Skip to content

Tag: 蘇菲

Sophie 又一窩心之作

話說星期六晚老豆突然氣喘透唔到氣,屋企人送佢去睇急症。而我十一點零過去,搞到成零晨四點幾先返屋企瞓覺。係入房前見到部電腦有張紙寫住晚安。原來係蘇菲寫咗張紙仔同我講晚安,真係 sweet 到爆。 圖片取材自 https://www.facebook.com/窩心時光-Warm-Heart-100754762048475/

蘇菲的感謝咭

亞囡識得感謝我,真感動。希望佢會明白要努力過後才會有收穫呢個道理。不過我又想佢明白,努力過後未必一定有收穫嘅道理,凡事唔好因為想有報酬先做喎。好似好矛盾,點解釋畀佢知呢? 圖片取材自 www.chuenyuen2.edu.hk (學生 寗嘉茜作品)

暖在心

哈,今早瞓醒,執一執背囊,執返啲嘢出嚟放低係酒店房,點知比我執到蘇菲寫嘅咭,之前嗰晚佢已經比過我睇,話我去咁多日,所以畫咗張咭比我,估唔到佢居然放埋入我背囊。。。真係甜!

玩遊戲

今日同蘇菲玩配對,順便教佢認字。本身係一件好沉悶嘅事,但我呢個老豆就為咗提高呢個遊戲嘅樂趣,我就話,不如邊個搵到啱一對嘅就可以啜對方一啖。呵呵呵~~~ 我當然發揮年青時讀書嘅本色啦,次次都搵唔到,又或者搵錯咗,等蘇菲可以認叻叻之餘,又可以認多啲字,我又可以比亞囡“抽水”。 真係爽 圖片取材自 sidonie.ca

蘇菲笑話一則

坐車去迪士尼途中,蘇菲係架車度瞓著咗。但係一入到樂園就即刻醒神晒。但係落車之際。。。。蘇菲:呢隻腳有閃閃(即刻脫鞋)我:隻腳底有嘢?摔腳底,掃腳,著返鞋。蘇菲:隻腳仲有呀,仲有閃電呀!(又再脫鞋)我:邊有呀,掃咗腳底來回幾次,再用眼逐吋咁睇確認無嘢,然後話無啦蘇菲:有呀,閃電閃電呀!我:你係想話腳痺呀嘛?落地行一陣就無事㗎啦! 呢啲唔係閃電,係腳痺,知道嘛