今次台中復活之旅, 真係未出發先興奮. 我o地真係好似o的旅行團有茶會開, 又有 Schedule, 活動項目, 所有詳細資料都列晒出o黎比團友睇, 清清楚楚, 真係無得頂. 由於今次旅行係自助遊, 我o地會租兩架七人車, 一架係由我負責, 另一架就由 Solomon 負責. 而所有食住玩安排就由我o地今次活動發起人 Jacky 安排, 佢一腳踢.
由於大家都希望開一個茶會去了解行程, 去o的乜o野地方, 會做o的乜, 所以我o地就係元朗儷都酒樓延開一席. 當席間大家都了解晒行程後, 突然間有人發現一個問題, 就係邊個會坐邊架車, 原來仲欠團友o既坐車安排. 突然間有人話不如劃鬼腳o黎分配, 係大家一致同意之下, 我o地就交由個天o黎安排了. 最激係連四位正副司機都要進行抽籤, 睇下邊個負責開邊架車, 好彩最後兩位正司機都抽唔中同一架車, 如果唔係都唔知點算好… 於是就出現o左以下o既結果:
A 車: Amy, Vani, Tony, BoBo(副機師), Jacky(導航員), Rakan(機師)
B 車: Miss Ma, Eve, 亞婷, 亞吉, Victo(領航員/副車手), Solomon(車手)
你o地話係咪, 未出發先興奮呢!!! (其實最興奮應該係亞 Sol, 因為佢成車都係女!!)!!
第一日, 我o地早上七點已經進行o左一個遊戲, 就係邊個最遲到達機場, 就要請食早餐, 其實事前係無咁o既安排, 所有o野都係即興, 大家估唔估到邊個咁黑仔?? 之唔係就係 Solomon 囉… 人齊之後, 大家就去o左食免費早餐, Solomon 萬歲!!
係候機室等緊o既時候, 我先發覺原來我無帶張 Plus o既信用咭, 咁即係我唔可以係台灣o既櫃員機拎錢, 咁就大獲啦, 即係要問人借? 唔係化…. 家下我只有張 Cirrus o既信用咭, 唔知可唔可以係台灣用呢?
到達台中航空站, 個機場真係好細, 辦理完出境手續後, 我拿拿臨走去櫃員機, 見到有 Cirrus o既標誌, 當堂安樂晒, 但係當我放張咭入去時, 個 screen 突然黑o左, 心諗, 唔係嘛, 食咭? 咁黑仔? 我不停係咁按o的 button, 但都係無反應, 大約經過三十秒左右, 螢幕出現返影像, 點知係賣廣告o既畫面, 心中一寒, 冷汗直標, 頂, 真係食咭, 正想打電話求救之際, 畫面居然出現 – 請輸入密碼, 唉…….. 真係比佢玩死…..
圖片取材自 www.summittour.com.tw