Skip to content

台中復活之旅 – 駕車樂 I

呢個旅程真係比o左好多緊張刺激o既o野比我, 真係令我膽都大o左!

去到台中, 辦好晒租車手續之後, 當然係上車睇下架車究竟係點開o架啦, 望一望, 嘩, 係軚波o黎o架?  真係唔多曉點入波喎, 好彩經過摸索之後, 最後都習慣o左.  其實開頭都有o的緊張, 話晒叫係外地第一次開車, 而且又係左軚車, 真係唔知自己分唔分得到右上左落.

第一個目的地係我o地午餐o既地方 – 新加坡甕缸雞, 原本安排 B 車帶路, A 車隨後, 點知因為 GPS o既問題, 加埋一架貨車o既”幫助下”, B 車車手好輕易咁撇甩o左我o地, 就係咁, 我o地 A 車跟住就要展開 “路在口邊” 遊戲.  經過不停o既問路, 探路, 我o地用o左一個鐘o既時間終於去到目的地.  而 B 車亦比我o地早半個鐘到達.  不過亦因為咁, 因禍得福, 經過一輪熱身, 我開車o既技術, 路面o既熟悉度, 已經熟練起o黎.

由於我o地住o既地方係民宿, 而民宿亦座落係一個山o既頂峰上, 所以為o左安全理由, 加埋我o地對山路o既唔熟悉, 我o地下午五點左右就已經開車上山, 大家估下個山有幾高?  有成一千呎咁高呀.  而呢間民宿係唯一一間可以睇到雲海o既地方.  由於初次開車上山, 而o的山路又真係好崎嶇, 又無街燈, 又多彎位, 真係要打醒十二分精神開車, 我o地差不多足足用o左成個鐘頭先去到民宿.

第二朝我o地o既目的地係大雪山森林區, 主要係去欣賞千年神木同埋天池, 呢個森林區位於海拔二千多呎, 我o地又再次向頂峰挑戰!  呢段路唔錯, 唔知係咪因為係旅遊區, 所以o的山路無咁彎, 無咁爛, 全程都好舒服, 只係其中一段路仔比較險峻.  我估計由於之前發生過山泥傾瀉, 所以搞到條行車路全由沙石堆砌而成, 又無欄杆 (記住: 下面就係萬丈深淵).  過呢段路之前, 我o地見到有個牌寫住, 夜間不准行駛此路.  !! (全車人睇到條路時第一個反應!!) 所以當我開車過去時, 都會開得慢少少, 怕開太快o的沙石會令車胎跣胎, 而雙手亦不其然咁緊握軚盤, 避免會出現搶軚情況, 由於 BoBo 有畏高症, 所以行呢段路時真係好驚, 佢全程唔敢向外望, 真係好搞笑!

我o地睇完景點之後, 就再開車去第二個目的地 – 石圍牆酒莊.  係落山時, 突然落起毛毛細雨, 而且又有涼風, 空氣又清新!  我o地 A 車打開車窗, 沿路欣賞美景, 感受大自然o既氣息. 開開吓車, 心諗: 天呀~~~ 係o的咁o既環境下, 我真係好想瞓呀!!  就係呢個時候, 突然比我係倒後鏡見到o的乘客係度瞓緊, 連帶我o既導航員都有睡意.  當時真係想停低架車, 泊埋一邊, 大家齊齊瞓.  可惜, 司機係要繼續向前行.

由於係酒莊時, 職員同我o地講, 今晚山上會大霧, 叫我o地早o的上山, 唔好太夜先上, 因為佢擔心會有危險, 所以我o地五點左右又再返上山.  果然好似酒莊職員所講, 我o地上山時, o的霧開始大起上o黎!  經過o左兩次o既上落山經驗, B車車手同我都習慣o左架車o既性能, 路面o既熟悉度又多o左, 所以今次上山o既時間比第一日縮短o左, 大概 45 分鐘已經返到去民宿了.  

Published in周遊列國

Be First to Comment

Leave a Reply