Skip to content

台中復活之旅 – 駕車樂 II

經過o左兩日o既駕車體驗, 係身心都得到充分調整之下, 以為可以輕鬆面對跟住落o黎o既路程, 點知就係呢個時候, 又再出現一次難忘o既經歷.  係第三日早上, 諗住一早出發到市區食早餐, 點知山上面好大霧又大雨, 所以唯有留係農莊, 等霧散o左先落山出發去計劃中o既旅遊點!  點知經過個多小時, 山上面o既霧完全無消退o既跡象, 正當大家猶豫o既時候, 團長就話好似無咁大霧啦喎, 其實都可以落山, 只要開車小心o的應該無問題.  我諗大家都覺得如果再留係山度, 真係唔知做乜好, 會好浪費, 所以大家就一窩蜂咁上車, 落山囉….

因為 A 車係帶頭落山, 所以我開得好小心, 話時話當時真係好緊張, 隻眼有咁大睜咁大, 唔可以有乜差錯.  當時好大霧, 能見度又低, 咁大個仔都未試過係咁o既環境下開車, 雙手亦不其然咁緊握軚盤, 自己又將成個人向前傾, 希望自己可以睇清楚路面情況; 另一樣我擔心o既係 – 團長, 佢又因為擔心, 佢將自己個身伸出車外, 係咁大叫提醒我, 左轉右轉, 小心有暗彎.  由於佢咁樣伸出去, 所以我都盡量將架車靠向司機o個邊, 避免團長會撞到o的樹枝或者其他雜物.  其實每當知道要轉彎, 我都會不停咁響”on”, 因為擔心對頭車睇唔到我而撞埋o黎就唔好啦.  係本來只需要 15 – 20 分鐘o既落山路, 我o地足足用o左成個鐘.  終於係山腰附近開始霧退, 視野變返清晰, 安全落山.

唔知係咪因為剛剛集中力太強, 我落到山就話不如等副機師開車, 因為佢都申請o左駕駛執照, 無理由唔係外地開下車o架嘛, 就係咁, 副機師 – BoBo, B車副車手 – Victo,  佢o地就開車載我o地去薰衣草森林啦!  唔知 BoBo 係咪緊張, 佢居然無放手掣就開車, 比團長發現o左又話佢一餐, 好慘…  不過我o地最終都順利咁到達目的地, Yeah~~

初時諗住薫衣草森林會好大陣薫衣草味, 點知又無喎.  去到影相, 影呀影, 不知不覺又到食 lunch 時間, 今次呢個瑞士”瘋”料理, 真係無得頂, 我o地 A 車兩位o既廚神, 表現o左佢o地最強一面, 令我o地 A 車o既人大飽口福, 正!!  快樂o既時候, 時間過得寧舍特別快, 轉吓眼, 我o地又要去下一個目的地, 就係去買手信, 中一餅店!  不過咁o岩得咁橋, 佢o地出名o既”臍”粑餅賣晒, 老闆叫我o地第二朝再o黎過, 整定新鮮o既比我o地.  後來又擔心太晚返上山會危險(又係呢個原因), 所以我o地又五點鐘左右就返上山, 完成o左今日o既行程.

第四日, 最後一日, 真係有o的唔捨得, 琴日先戰戰兢兢咁落山, 今日就好不捨咁落山, 有o的落幕o既感覺.  不其然咁講聲, 再見啦~

秋名山 (當正自己係滕原拓海), 第二日有機會再o黎征服你!  由於要還車, 我o地去參觀完客家文化博物館, 買完手信之後, 就出發去台中市, 就係呢個時候, 係途中, 我o地發現原來我o地原本計劃去o既客家文化區原來係呢度, 見仲有時候, 大家又高高興興咁去參觀影相.  

去到台中, 只係一點左右, 我o地還完車之後, 我o地就各自分開搵食, 買手信, o黎到台中, 當然要買太陽餅啦, 仲有鳳梨酥, 我o地去o左一間叫元明商店, 本地人好喜歡呢間店, 話夠傳統, 好味喎!  講真, 佢o地無老點, 真係好味道!! 

經過o左四日三夜, 最後大家都好滿足咁返香港.  台中, 我o地會再o黎o架, 我知你仲有好多地方我o地未去, 等我呀….

Published in周遊列國

Be First to Comment

Leave a Reply