29-Sept
由於之前係台南新光mother care買o左o野, 但係台南無現貨, 所以改係台北取貨, 今日就去咗信義區o既新光… 係 google map 查一查, 發現原來信義區有間誠品旗艦店, 咁係無安排行程之下, 我o地決定去信義誠品朝聖一下. 但係萬萬估唔到, 一行就行o左成日了~~ 旗艦店裡面有好多層, 真係分類分得好有條理, 真係每層有每層o既o野睇…. 最後, 我o地都敗了~~~ 亞囡就好開心囉, 佢最多禮物! 而且每層都會有間餐廳或者coffee shop, 比人可以抖下, hea 下. 我o地就揀o左一間比較有格調o既入去, 仲點o左個high tea 二人餐添…. 感覺好高級呀~~~
當然我唔會忘記今次o黎台灣o既目的, 係誠品遊玩完後, 就飛快咁返酒店換衫, 出發去參加朋友o既婚禮. 係酒店去, 只係十分鐘左右車程, 真係近到不得了. 今次係第一次參加台灣人o既婚宴, 估唔到同香港都係差唔多, 都係播下片, 講下感受, 敬下酒咁囉. 不過呢餐係比較特別, 唔係好似香港咁, 菜單千遍一律, 今次主人家特別搞搞新意, 有牛肋骨, 有烏雞湯, 有蝦干蒸飯……. Michelle, 係度再祝你新婚快樂!!!
30-Sept
最後一日, 去了光華數碼新天地, 以前個名叫光華商場, 點解去? 由於上次去時已經係十年前有多, 聽聞佢已經變咗, 所以身為IT人, 點都要去朝聖一下… 其實真係無乜特別, 一個旺電咁, 不過佢有七八層咁高, 旺電得三層! 朝聖完, 時間已經差唔多, 已經要去機場返香港啦!
成個旅程, 真係前所未有咁hea, 亦係未試過未plan 行程就出發. 連心目中想去邊都未知, 真係可以話兩手 fing fing 就離開香港…. 不過呢次旅程都好開心…
食店資料
鵪鶉晚餐 – 台南市開山路141號, 逢周三休店, 電話: 06-2141295, 營業時間: 18:00 ~ 00:00
鵪鶉鹹派 – 台南市府前路一段126號, 電話: 06-2282038, 營業時間: 09:00 ~ 17:00 (http://www.quailquiche.com.tw/)
深藍咖啡館 – 台南市府連東路55號, 逢周一休店, 電話: 06-2387722, 營業時間: 08:00 ~ 21:00
阿美鳳梨酥 – 台南市中西區民權路一段88號(東市場口), 電話: 06-2269102
衛屋茶事 – 台南市北區富北街72號, 逢周二三休店, 電話: 0926-251-123, 營業時間: 13:00 ~ 22:00
eslite Tea Room – 台北市信義區松高路11號, 電話: 02-8789-3388 (http://www.eslitecorp.com)
青青食尚花園會館 – 台北市士林區至善路二段266巷32號, 電話: 02-28411996 (http://www.77-67.com/)
士林夜市 – 台北市士林區大東路、大南路、文林路、基河路範圍內巷, 營業時間: 11:00 ~ 02:00
士林官邸飯店 – 11163台北市士林區文林路102號, 電話: 2-2880-5599, (http://www.grandeehotel.com.tw/)
每個 I.T. 人過嚟台灣都要參觀一下！
而家呢個光華已經同我幾年前嚟嘅時候，變得好唔同了！
而家似旺電，以前似八十年代尾嘅黃金！