第二場比賽係晚上十點進行, 地點同樣係和宜合道室內運動場舉行. 今場比賽之前, 原本諗住放工後去荃灣食o野, 然後行一陣街, 之後再慢慢去球場. 不過諗下諗下, 橫掂去開荃灣, 不如去一去 Data Center, 幫個客部 Server set 返少少o野先. 點知一去到, 見到部server 死o左火牛, 連 hard disk 都死o左隻, 好彩佢係行 mirror, 所以得返一隻都無問題, 可以繼續行. 就係咁, 原本諗住5分鐘可以走得去食飯, 點知搞下搞下, 搞到成九點三先走得… 然後急步去食晚飯, 然後就搭的士去球場…
十點開波, 今場對手又係好高大, 見佢o地都好後生下, 賽前估計應該係快節奏….. 一開賽時, 我o地打出一個9:0 o既Run, 諗住今日大家都好好狀態, 應該有望可以再下一城, 但對手嗌o左個暫停之後, 就開始半場人釘人, 搞到我o地方寸大亂, 節奏上面完全跟之前完全唔同, 好快就比對手反超.
第二節開始, 我o地靠亞ROY o既單打獨鬥, 都勉強只落後對手幾分, 可惜, 一個人始終打唔贏一隊人, 所以無論我o地點做, 都追唔返之前失去o既分數. 完場後, 我o地大家賽後檢討, 都認為點比, 我o地都係會輸, 因為對手年青, 有用唔完o既體力, 有速度, 有高度, 有彈跳力(佢o地賽後仲可以係球場玩入樽), 所以照秤o既話, 我o地都係輸.
今場自己表現真係麻麻, 自己賽前練習都無乜球感, 下次真係要快o的令自己進入狀態, 希望到時可以幫球隊贏波.
統計
得分: 2
籃板: 3
圖片取材自 www.diabetes.co.uk