Skip to content

葉問 2

今日係葉問2第一日上畫, 我都係第一次有一套戲一上畫, 我就已經去睇.  點解會咁心急?  因為睇完第一集已經好喜歡, 喜歡武打場面, 喜歡拳來拳往的感覺, 好有真實感.  現在太多講科技, 特技, 完全由電腦來達到心目中的場面.  唔係話特技片唔好睇, 我都好喜歡 Wall-E, 功夫熊貓等等的動畫, 全由電腦創造.  可能人類都總有一點獸性, 看武打片都總會特別起勁, 當雙方對打時, 真的有點肉緊, 每條神經都繃緊.

我最喜歡的一段, 應該要算是甄子丹和洪金寶對打那一段, 真的是打的暢快, 精彩, 睇得肉緊非常.  片長1小時47分鐘, 全片毫無冷場. 看完之後真的大呼 – 過癮.    不在這裡講太多內容, 因為想留比未睇的你去感受一下這一套我認為是值得欣賞的電影. 

小插曲:
在未開場前, 有一對情侶拎了一袋麵包進場, 跟著看見一個職員尾隨勸阻, 需要將食物交給他們, 他們會保管.  可惜, 哥仔就不停講, 我為乜要交俾你, 我又唔係而家食, 點解唔能夠拎入場, 咁職員好有禮貌回答 – 不能攜帶食品入場, 這是規定.  而哥仔又再大大聲講, 我交俾你, 你整爛咗咁點算.  職員又再強調, 食品唔能夠帶入場.   但哥仔一而再, 再而三咁講相同的話, 唔肯交比職員.  戲院其他觀眾開始不耐煩, 其中有位亞叔就”小”呢條友仔: 靚仔, 有 policy o架嘛.  然後條友仔以為亞叔幫佢, 仲問職員聽到未, 亞叔又再講: 靚仔, 話緊你呀, 妖~~~(亞叔真係講妖呢個字, 呢個音大體得來又表現得到佢o既憤怒)  當亞叔講完妖之後, 我立即拍掌, 以示支持亞叔.

但係哥仔仍然不屈不撓, 繼續對抗職員, 仲大大聲講: 嗱, 各位做證呀, 如果袋包有乜損傷, 佢哋要負責.  哈哈, 佢都傻o架, 邊有人會理佢!!  跟住開始觀眾都有啲唔耐煩, 有人大聲叫報警啦!  而我就講: 退錢比佢啦, 唔好係度浪費時間!  然後聽到職員話: 我哋願意退錢比返呢位先生.  因為已經過咗開場時間, 在場人仕已經開始比壓力呢對情侶, 最後在全場壓力下, 哥仔終於屈服, 將包麵包交比職員, 職員離開後, 立即熄燈, 什麼廣告, 什麼熄手提電話訊息都無, 即刻去片…..  GOOD~~~

呢個世界真係乜人都有.  如果你又係在場觀眾, 你又會點呢?

圖片取材自 www.newton.com.tw

Published in影音天地

Be First to Comment

Leave a Reply