Skip to content

靈魂之窗

自問身體向來都健健康康, 無乜病痛!  細路仔時代, 就好似唔識病咁, 最多係跌損, 擦損, 總之都係唔小心整傷自己, 記得最嚴重一次係由山腰碌o左落山腳, 攪到損手爛腳之外, 就係整斷o左左手邊o既鎖骨!  足足醫o左成三個月, 諗起都覺得痛~~

 而上到中學, 都好少病痛, 普通傷風感冒一年都只係兩三次, 有可能自己係傻瓜, 所以唔識病.  冬天仲可以著件校服加冷衫就算…  唔知係咪而家o既細菌多o左, 勁o左, 攪到自己都弱o左咁呢?

近呢兩年, 身體真係多o左好多毛病, 講緊o既唔係普通傷風感冒, 而係一o的好令人厭煩o既病痛………….

上年年頭, 比一o的唔知乜鬼真菌, 攪到我有濕疹, 足足醫o左成年, 今年年頭我先攪掂, 而家仲要戒口, 牛, 海鮮全部唔食得!!  只係可以食, 好慘!!  試過偷食, 一食就弊傢伙, o的濕疹即刻出o黎, 煩~~~  

但係估唔到八月份, 居然隻左眼生o左粒眼瘡, 八月中走o左去割之後, 以為會無事啦, 點知九月尾, 無啦啦訓醒之後, 擦牙照鏡時, 發現到我o既眼睛眼白o既位置(又係左眼), 有o的紅色, 初時以為係整損o左, 或者係微絲血管爆o左o者, 所以都無理, 但係佢一日一日咁長大, 而家差唔多半隻眼都係紅色, 所以上個星期走o左去睇o左專科, 醫生話無乜問題, 滴o下眼藥水應該好快無事! 但係過o左一個星期都無乜進展, 我又去睇多次醫生, 佢今次話要滴o的乜鬼水落隻眼度, 等個瞳孔放大, 然後睇清楚會係乜, 點知, 都係無答案, 佢話比另一隻藥水比我, 話等多兩個星期, 睇下情況點, 佢估計八成機會係我o的血比較濃, 所以久久都唔散, 唔會有事, 萬一真係唔散, 佢話到時就要抽取組織化驗喎!!  

濕疹最多係戒口就會好返, 但係隻眼真係唔知做乜事, 打波無撞親, 又無比人篤親, 攪乜鬼呢??   而家都好擔心!!  希望兩星期之後, 會散o左o的”瘀血”啦~~

Published in關於我的....

Be First to Comment

Leave a Reply