恭喜!!! 恭喜~~ 9月24日文氏夫婦係尖沙咀註冊, 獲得香港特區政府o既承認之後…………. 10月7日o既早上, Jacky 係黃金海岸接過新娘, 老爺奶奶飲過新抱茶之後, 晚上再去潮濠城擺埋酒, 經過咁多事, 根據中國人o既傳統, 亞吉終於正式成為 Jacky o既老婆啦.
今日一早5點零起身, 真係無乜可能自己會咁早起身, 為o既咪就係做 Jacky o既兄弟, 幫佢手去接新娘囉. 今日一定要將新娘搶到手!
首先大家兄弟係黃金海岸o既麥當奴食過早餐之後, 大家就整整齊齊咁出發去接新娘!! 經過一輪龍爭虎鬥之後, 什麼石春路除絲襪, 心心相印, 腳指夾蓮子, 身體夾波波等等, 我o地話都無咁快就完成任務. 最後當然係文生讀o左佢o既愛的宣言, 先至順利接到新娘! (喂, 原來咁就可以接到新娘, 咁我o地之前做乜要比人玩咁多o野呀? 文生~~)
晚上, 文生文太係長沙灣潮濠城大排30幾圍, 廣宴親朋戚友來分享佢o地o既喜悅, 而過程都順順利利, 朋友們亦都好俾面, 差唔多都到齊! 又估唔到文生人緣咁好喎!!
不過今次做兄弟, 反而比自己當日結婚仲要累, 好似賣命咁, 要做到妥妥當當, 唔好有任何遺漏, 所以壓力都幾大! 不過無計, 鬼叫係朋友咩!! 諗下諗下, 真係有o的擔心, 跟住落o黎o既11月, 12月, 我都要幫手做兄弟, 嘩, 諗起到攞命. 下年除o左 BoBo 之後, 所有朋友都係推o左先!! 怕怕!
Be First to Comment