Skip to content

選擇, 決定

自你出生o既一刻開始, 你已經要去面對好多o既選擇, 作出好多o既決定.  BB 時, 你要選擇飲唔飲奶, 你會決定喊唔喊去吸引人注意.  到大個, 你更加多選擇放係你面前, 你要選擇你o既小學, 中學以及大學, 又或者要選擇繼續讀書定係出o黎社會工作!!  工作時又要選擇邊條路係適合你; 甚至連玩你都要去選擇, 去日本好定係去美國好! 遊戲機買 PS3 定係  Wii 好.  其實邊個決定先會係正確, 面對種種難題o既時候, 你要心思熟慮咁去諗清楚每一步, 只要你行差踏錯, 機會就會從此消失.  

講到好大件事咁, 其實每一日每個人都有好多o野要決定, 有時真係會好累….  人~~~ 點解會有咁多選擇, 又點解要做決定呢?  乜唔係話船到橋頭自然直, 乜都唔駛諗, 凡事都有因果; 乜唔係上帝會從中幫你o既咩?  會比指示你咩?  點解咁多人會行錯路?  又點解咁多人同一件事都會有唔同睇法, 唔同想法, 搞到o的人唔知點選擇好, 點做決定好?  

大家唔好誤會, 我唔係發o左神經, 只係突然覺得, 人有太多選擇啦.  有時真係天真咁諗, 如果簡單一o的, 每個人生出o黎都已經有特定o既任務, 咁佢就係咁過一生, 會唔會好o的呢?  但係如果係咁的話, 人生咪好沉悶?  好無挑戰? 人生咪會變得唔精彩?  真係好矛盾.

其實近排公司有個同事要離開, 佢雖然只係同我相識o左四年幾, 但係我o地真係好好朋友, 好多事都會商量, 大家亦一齊將公司搞得幾好, 佢亦將大陸隊 team 管理得好好, 就係因為佢, 我o地亦係大陸成立o左公司, 好多事情都係佢做出o黎!  公司亦開始上力o既時候, 當佢亦覺得公司唔係無前途, 唔係無希望o既時候, 佢突如其來話要離開公司, 原因係因為佢要去幫爸爸, 亞叔手, 管理家族生意.  呢個決定真係好突然, 之前都有提過, 但係呢年幾以來, 佢都推o左好多次, 點解今次咁突然會推唔到?  一定要去幫手呢?  佢呢個決定真係令我好唔開心, 話晒大家都一齊努力打拼過, 當中有辛苦, 有開心, 大家亦一齊決定好多o野, 去解決好多問題.  大家有問題, 有難題, 一定坐低大家研究, 一齊去解決. 

當然我無怪過佢會有咁o既決定, 父命難違, 佢接受當然有佢o既理由, 佢既然選擇o左返去幫手, 佢就要努力, 唔好衰返o黎比我o地睇, 我o地 NCHK o既人, 唔會咁易衰, 一定要堂堂正正, 光光彩彩返o黎見我o地.   記住, 朋友, 你去到o個邊要硬淨o的呀…  唔好比人蝦呀!!

另外又有個朋友要選擇工作方向, 佢問o左好多朋友, 好多朋友都叫佢跳糟, 話人工高, 當然要走.  唔知點解, 當佢聽得愈多, 佢愈擔心自己跳糟係錯, 點解會咁?  最後佢問我點睇, 我問o左佢好多問題, 當我問得愈多, 佢答得愈多, 佢終於知道自己應該點揀.  太多o既選擇真係好易令人混亂, 所以做人真係要睇清楚, 諗清楚先好去做決定!  人生實在太多選擇, 太多決定放係你面前啦, 所以有時諗唔到, 諗唔通o既話, 可以搵下朋友傾下計, 或者咁樣可以比到你啟示都唔定!!

朋友們, 我希望你o地所有o既選擇, 決定都係正確!  Friendship Forever!!!

圖片取材自 huntersherry.com

Published in公司

Be First to Comment

Leave a Reply