Skip to content

遊船河

遊船河?  喂, 乜你識游水咩?  你都會去玩海上活動o既咩   哈哈…  係呀, 我唔識游水o架!!  但係我以前去泰國時又玩過香蕉船, 水上電單車喎!!  唔係一定要識游水先可以玩o架嘛, 我有著救生衣, 何況有咁多人係度, 點都搵到一個半個o黎救我o既, 嘻嘻~~~

今次公司搞船河真係煩, 點解咁講?  首先係預定出發前一日, 居然掛九號風球, 搞到要押後出發, 到o左第二次出發前一日, 又係狂風暴雨, 諗住又要押後, 點知船家話如果唔係掛風球, 無得取消, 照出發, 前一日都仲落雨落到死, 第二日梗會落雨啦, 搞到無晒 mood!!  好彩, 係出發當日居然變得天朗氣清, 熱到爆, 呢日真係好適宜出海, 爽~~~

當然係出海途中無乜o野做, 梗係玩下麻雀啦(連遊船河都可以打麻雀)!!  到o左目的地, 大家都好興奮咁跳晒落水, 唔知係咪因為實在太熱啦, 真係要去浸一浸, 解下暑呢!  我?  當然無落啦, 原本都無打算會落水, 只係陪下大家高興一下先參加o者, 所以乜o野替換o既衫褲都無帶, 更何況我都唔識游水, 點會係大海中暢游呢?  亞媽都有講啦, 嬉山莫嬉水呀….  我不如係船上充當攝記, 拍下o的靚女仲好啦… 嘻嘻 (講緊隔離船o既三點式 XX)

當日終於見識到傳聞中過氣體育老師o既 wakeboard 風采, 佢好勁, 真係引o黎好多艷羨o既眼光, 引死好多女仔, 可惜可惜, 一山還有一山高, 估唔到另外公司o既朋友, 佢玩得仲好, 即時將佢比下去, 過氣體育老師, 唔駛灰心, 你仲有大把時間慢慢練, 他朝有日, 你一定可以玩埋花式o既, 到時再表演過. 

食o左午飯之後, 今次船家就載o左我o地去岸邊沙灘玩, 返上岸喎, 我當然落去玩下啦, 就係咁, 我就拎o左個沙灘排球落去玩下波仔啦(岸上都有好多美少女玩緊呀).  始終o黎得遊船河, 梗係要落下水, 呢個唔係我o既諗法, 係班衰人o既諗法, 點解咁講, 你o地應該都會估到我最後o既收場, 就係比佢o地掟o左落海囉….  成日濕晒, 好慘呀!!  最後我要係西貢買o左條褲同 under 去替換.

總括o黎講, 雖則我唔游水, 但係同班朋友去玩下, 都好開心…..

Published in公司

Be First to Comment

Leave a Reply