煙臭難頂

話說有一日好累咁搭車返屋企, 帶住 headphone, 閉目休息, 想必大家都有咁o既經歷, 一覺瞓到落元朗, 爽~~~

但o個日好衰唔衰, 瞓唔夠一個站, 突然比一陣惡臭難頂o既氣味整醒o左, 開眼一看, 發覺身邊坐o左個男人, 而呢陣惡臭難頂o既氣味, 就係發自佢身上.  而呢陣味比臭孤更勁.  臭孤都可以噴止汗劑, 又可以做手術去醫治.  但呢陣味係經過長年累月, 慢慢咁積慮返o黎, 而呢陣味已經同個人融合o左, 佢本人自己都唔會發覺, 但身邊o既人就真係慘囉..

呢陣味就係我標題所講o既煙臭味加汗味, 夾雜埋一齊之後, 真係超難頂, 非筆墨所能形容.  佢坐落o黎o既一刻, 我就算幾咁眼瞓都好, 我o既睡意即刻消失, 換o黎o既係一種嘔心o既感覺.  佢本人全無問題, 只係佢本身發出o既氣味, 真係令小弟不適.   諗返轉頭, 其實都係小弟不才,  細細個真係要勤力讀書,勤力練功.  勤力讀書的話, 大個掙好多錢, 做個有錢人, 咁就唔駛搭巴士, 應該有司機接送.  勤力練功的話, 咁就可以練成閉氣功, 而家又未練成閉氣功, 又唔能夠只係靠皮膚呼吸….  而家乜都無, 所以我唯有起身, 我認輸, 既然睡意全消, 企下又何妨呢?

估唔到香港政府做o左咁多功夫, 推行禁煙運動, 都係想市民可以遠離二手煙, 有個空氣清新o既生活環境, 但係估唔到百密一疏, 我都仍然可以吸到二手煙, 仲有料加添.

Leave a Reply

This site uses Akismet to reduce spam. Learn how your comment data is processed.