Happy Birthday To VICTO~~~~~
今年原本打算去大嶼山或者長洲同 Victo 慶祝生日, 點解會去呢兩個地方? 因為好似好耐都無去過了, 所以就搵個藉口去下囉…. 又原本打算一早出發, 點知 Victo 又約o左屋企人去飲早茶, 搞到個 plan 錯晒!! 諗住佢都係飲早茶, 十一, 十二點左右應該返o黎, 點知佢成點幾兩點先返…. 咁晏, 仲可以去邊慶祝?
哈哈, 突然間腦袋一轉, 真係無諗過自己仲咁有衝動, 我居然話去澳門走一轉….. 坐言起行, 二話不說就換衫出發上船, 到澳門已經係下午四點九. 由於真係o黎o左澳門太多次啦, 什麼名勝景點, 我o地兩個都無去, 只係去o左新馬路行下街, 睇下o野, 食下o野, 影下相….. 話咁快就到o左六點半, 即刻搭車去我o既至愛食店 – 新陶陶酒家, 可惜, 去到無位!! 當然我唔會咁輕易放棄啦, 我問哥仔, 幾點會有位, 佢話八點半, 咁我即刻話訂, 八點半, 兩位, 唔該…
呵呵, 真係好肚餓, 八點十五分我已經急不及待走去問有無位, 
, 早到的鳥兒有蟲吃, 好o野, 有位!! 坐低當然即刻點菜~~~ 兩個人可以食o的乜? 可以食到幾多o野? o野就唔駛食多o既, 因為我o黎呢度最大目的就係”佢”, 佢係邊個? 哈哈, 去回憶集睇下啦!! 係呢個時候唔好同我講要保育, 我o既理智已經沖昏腦啦!! 唔好鬧我!!!
食飽飽, 搭車返出去, 原本打算趕十點半班新渡輪返香港, 但係知道澳門都有煙花放, 所以決定睇埋先走. 嘩嘩嘩…… 早知有煙花睇, 帶埋腳架o黎影相啦…. 而家手震震咁影, 唉~~~ 可惜, 可惜~~~
呢次澳門遊, 又可以同 Victo 慶祝, 又可以一飽口福, 又可以睇埋煙花, 真係一舉多得~~ 
好充實!!
希望 Victo 喜歡呢次o既生日之旅啦! 嘻嘻!!!