Skip to content

過關

我想大家都試過返大陸或者出國旅遊.  如果要出國旅遊, 當然係要到機場辦理出境手續, 出入境手續即係我o地俗稱o既過關.  無論你係經機場搭飛機定係經羅湖搭火車返大陸, 必然要過關, 先可以離開香港.  而香港政府為o左方便居民更有效率, 更快速咁離開香港, 係好幾年前就推行電子化計劃, 大家都有一張叫智能身份証, 呢張o野好多用途, 大家都知, 而其中一個用途就係用o黎過關.

過關大家都試過, 快唔快?  我覺得第一代o既 e-道 已經好快, 平均十秒左右就可以搞掂.  但係政府想再快o的, 咁就係年多前就推出第二代 e-道, 平均每人又可以再快三秒, 真有效率…….

搞乜過關要咁快呢?  今日終於比我知道係乜o野原因啦.  唔係政府想表現香港有幾咁先進, 科技有幾咁進步, 實質係因為香港人習慣o左急促o既生活, 久而久之令到政府都要順應民意, 加快出入境系統.

今日過關返大陸開會, 係過關o既時候見到有咁o既情況, 原本 e-道 o既設計係加快處理流量, 點知, 有o的市民因為手指模問題, 令到原本出境時間由 10秒變成分幾兩分鐘,  而排係後面o既市民, 佢o地由不停左望右望, 到變成 “好熱心” 咁指導 “被困” 既市民點樣先可以出返o黎, 當中我聽到o既有 (有次序o架):

“你放手先, 再按多次” > “亞生, 濕濕水先啦” > “換過第二隻試下啦 (唔係換第二隻手指呀, 係叫你換隻左手試下呀)” > 
“喂, 你副眼鏡呀, 除低副眼鏡嘛” > “少你呀 頂帽都要除o架嘛” > “襟鐘啦, 仲搞乜~~ 叫人放你啦”

其實被困o既市民, o個一刻心裡會點呢?  佢係熱窩上的螞蟻?  好焦急?  六神無主?  唔知道, 不過有樣o野好奇怪, 被困市民又會聽後面o既人講, 做足佢o地教o既每種方法.  我忽發其想, 如果o個一刻, 有人大嗌: “頂, 你除埋條褲啦” 或者 “頂, 乜Q都唔得, 你除Q晒o的衫褲鞋襪啦”,  你估, 佢會唔會照做呢? 唔知點解, 逢親過關排隊, o的人就會變得好焦急, 好燥, 你阻住佢一秒, 都會好似變得好嚴重.  搞到成個出入境廳都好似街市或者股票交易場咁, 嘈雜聲此起彼落, 尤其大陸關更嚴重.  當中o既 “熱心” 市民又有無你份呢? 

圖片取材自 www.immd.gov.hk

Published in談天說地

Be First to Comment

Leave a Reply