Skip to content

台北 VoIP Training

十一月二十四日出發前往台北, 一同前往的有星加坡的 Partner.  這次去台北最主要係學習一款 VoIP 的使用和設定.  這次 Training 為期三天兩夜.  而課程真係全日, 由早上九時半開始到下午五點半才放學, 好耐都未試過返全日, 好辛苦….

而整個課程真係可以快速令我明白點去設定呢隻VoIP, 清楚它的功能….  如果只係靠睇 Manual 去設定, 真係有可能要花一兩日去設定, 而家只需要大約十五分鐘就搞掂了.  個 Training 到星期四結束, 理應星期五返香港, 但由於星期五需要跟台灣一間系統公司傾談合作計劃, 既然星期五都仲要留係台灣, 所以把心一橫, 留到星期日才離開台北, 順便係台北逛逛才回港.

星期五下午開完會, 見有時間, 我就去了中山區的一個地方, 台北光點, 一個幾好的地方, 繁華鬧市中的一個清靜地.  坐在庭園中, 喝一杯咖啡, 看看書, 逛逛誠品書店, 感覺真的很好…  大家下次去時, 不妨到此一遊.  嘆完茶, 仲有時間, 當然係去買手信, 什麼鳳梨酥, 鳳黃酥, 黑炭鳳梨酥……  哈哈, 真係買得好暢快, 錢都駛得好快….

星期六一早就出發往淡水.  其實我都唔知淡水有乜好地方去, 不過之前同星加坡 Partner 傾過會去淡水, 佢介紹了我去一個地方 – 紅毛城, 呢個地方曾經比日軍佔領過, 而且以前是抵抗外敵的第一道防線.  由於之前一晚已經去過漁人碼頭, 所以今日就無去, 況且漁人碼頭都無乜特別, 只有一條叫情人橋的橋, 其他都無乜吸引.  係淡水老街遊逛, 遊下遊下, 見到有好多人排隊上船, 原來他們是過對面的八里, 我都唔知係乜, 估計都是一些名勝旅遊地點, 所以我都走去排隊, 乘船出發前往八里.

果然無估錯, 八里都是一個旅遊景點, 有一條長長的海岸公園, 如果要行完全程, 我想需時二個小時至三小時.  其實我都想行完全程, 欣賞海岸風景, 但可惜, 天公不造美, 下起毛毛細雨, 迫使我要走沿路回去.  由於已經行了差不多兩小時, 所以找了一家小食店, 吃了一碗虱目魚丸湯, 暖暖身, 然後隨處拍拍照, 趁還未下起大雨, 我便乘船返回淡水再轉乘捷運返酒店了.  

返到酒店附近, 已經是晚上七點, 呢個時間, 當然係去搵食啦!  酒店附近就係好出名的士林夜市, 我就去食了一塊大豬扒, 飲了一杯鮮果汁, 然後就返酒店了.  第二朝一早七點起身, 乘搭十點的飛機回香港去.  就這樣, 我的台北之旅就完結了.

雖然只是短短的一日半假期, 但已足夠讓我輕鬆一下, 放低所有壓力, 放低所有煩惱, 好好休息一下.  有時原來一個人去旅遊也不錯, 因為你喜歡去那裡就去那裡, 不用編排行程, 也不用照顧大隊.  但當然亦有不好的地方, 就是沒人替你拍照, 你需要自行找一個可以擺放相機的地方去自拍, 挺煩的.  而且想找人分享一下也沒有, 也不能吃多點美味的食物, 一個人的肚始終有限. 

唔知大家喜歡一個人去旅遊定係相約朋友/情侶去呢?

圖片取材自 www.hk-matrix.com

Published in公司周遊列國

Be First to Comment

Leave a Reply