Skip to content

深圳人才市場招聘會

今日係我第二次去深圳人才市場做招聘o既工作.  本來呢樣o野唔駛我做, 但係由於我同事突然間唔得閒, 去唔到, 所以改為由我頂上(上次都係咁)!  

記得第一次去o既時候, 成個人都好緊張, 因為本身國語唔係太好, 好驚會表達唔到, 同應徵者溝通唔到, 會好鬼瘀!  而且又唔知道應該要做o的乜, 好彩第一次去o既時候, 有一個香港同事同我一齊, 佢本身都負責開大陸招聘o既事, 佢當時都教o左好多o野比我, 例如要睇清楚應徵者係本專畢業定係本科, 原來係有唔同, 又要問下佢工作經驗, 又要睇下佢o既行為, 表情, 談吐等等….  真係好多o野要留意!  最重要係我上次係招聘會中, 我得到……..  一堂免費o既普通話!  點解咁講?  之前講過, 我o既國語唔係太好, 當我表達唔到o既時候, 我會用文房四寶寫出o黎, 然後應徵者會好自然咁讀一次, 咁我就記住個讀音, 咁樣仲唔係上課?  哈哈!!

今日再去人才市場, 已經無第一次咁騰雞, 只不過係見頭兩個應徵者時會有o的口吃o既情況, 之後都算可以應付, 可能未習慣一起身就講國語, 要做熱身!  今日o既招聘會比上次多好多人, 不停咁 in 人, 直到一點左右, o的人先 in 得晒, 連水都飲o左兩支, 如果有啤酒就好囉!!!   但係今次o既人才質素比較上次差, 我係半日o既應徵者中(50人左右)只係可以選到一個出o黎, 而另一個同事, 又係得一個可以睇得上眼.  失望!! 

呢兩次o既招聘會, 我真係見識到祖國o既文化!  求職者動作多多, 好似有o的人會不停咁 “un” 身 “un” 勢, 好似地震咁, 連佢o地個樣都睇唔清, 要開動 anti-shake 系統先得; 有o的就係不停咁左望右望, 向上向下咁, 好似以前o的大俠咁, 一講正經o野就會擰轉塊面, 死都唔望你, 吹咩!

  又有o的係會成頭大汗, 手又出汗, 個樣面青青咁, 好似就o黎要上戰場/刑場咁o既款, 真係擔心佢會心臟病發!  最誇張係…….  有o的人會不停咁向前傾, 好似幅圖咁, 企係應徵者左右, 聽下佢點作答, 通常聽得多, 到佢作答時咪可以當係參(抄)考囉!  有o的醒o既會修改少少, 再加少少自己o既o野; 但係蠢o既, 真係激到嘔白泡, 佢o地真係照字搬字, 版權所有, 絕不刪減!!  

今日見到一個求職者, 佢居然足足企o左係度半個鐘有多, 差唔多聽晒所有o既問題先坐落o黎應徵, 當然啦, 我又點會咁蠢, 開頭都問o左一條問過o既問題, 佢係屬於豬o既一族, 所以我即刻問o左幾條唔同嘅問題, 佢就即刻呆咗喺度唔識答. 佢真係無用腦去諗應該點答, 又畀人知佢僅喺度偷聽…. 真係唔知佢想點!

經過呢一役, 第一次見識過國內人才市場, 好彩之前聽過同事講嘅嘢先, 如果唔係真係會畀佢哋嚇親…..

圖片取材自 www.wenba.ca

Published in公司

Be First to Comment

Leave a Reply