< Day 3 >
昨晚應承了民宿老闆今朝8:30食早餐, 所以今朝就晨咁早起身落去食早餐. 民宿提供傳統台灣早餐, 尤其D粥真係好好食, 真係軟綿綿…
食飽飽之後就比亞囡玩多陣電動車, 又去打鞦韆, 9:45分左右, 就出發前往宜農牧羊場. 由民宿到牧羊場, 只係三分鐘車程. 牧羊場採取開放式收費, 入場就靠各位自動自覺入30蚊台幣去個收費箱. 裡面可以餵羊, 餵魚, 餵兔仔…. 每日仲有DIY做羊奶梘, 又可以去擠羊奶. 我哋錯過了做羊奶梘, 所以就去了擠羊奶.
擠羊奶係採取報名方法, 一大一細, 收費150蚊台幣. 呢個價錢已經包括一杯羊奶雪糕, 一紮草可以比你去餵羊, 真係抵到爛… 唔好以為只係擠下牛奶咁簡單, 主持講了很多知識, 山羊, 綿羊有乜分別. 又出問題考下各位參加者. 最後仲有一題猜四字成語.. 問題: 羊打電話給老鷹….. 唔知大家又識唔識呢?
擠完羊奶, 餵完動物, 又食埋羊奶雪糕, 飲埋鮮羊奶, 終於要起程出發去今次旅行最令亞囡期待的地方, 蘭城晶英酒店!
相信有小朋友, 又諗過去宜蘭的朋友, 應該都知道蘭城晶英酒店. 因為呢間酒店提供電動車任玩, 過百款唔同款式電動車任君選擇. 而且8樓, 9樓房間係可以俾小朋友開住自己架車係賽道(走廊)風馳電掣. 而自己架車仲可以泊喺房門口, 架車又有車匙, 又有專屬車牌, 真係好似自己擁有一架車, 感覺好好… 亞囡仲要自己袋住條車匙, 好小心保管.
除了喺自己樓層可以開車玩之外, 原來酒店仲提供一個室外賽道, 而且仲有一部分車款只有室外賽道先有提供. 酒店仲有駕駛訓練, 合格之後仲會有駕駛執照畀你添. 室外除了玩車車之外, 仲提供跳彈床, 巨型滑梯, 咁多遊戲, 真係唔駛旨意離開酒店.
終於一玩就玩咗三四個鐘, 跟住又係過隔離商場食晚飯. 今次揀了一間韓國餐廳 – 涓豆腐. 香港韓食通常都細細碟, 所以我們都叫了四五樣餸, 一送來, 不妙, 點解會咁大碟? 最後…..當然食唔晒啦, 唯有打包返酒店當宵夜.
呢一日, 時間又係過得好快, 好快……
08:30 食早餐, 玩一陣, Check out
09:45 出發宜農牧羊場, 餵羊, 擠羊奶
13:00 出發前往蘭城晶英酒店
13:30 酒店 Check in
14:00 食午飯
15:30 上房取車, 休息! 亞囡不停開車奔馳
19:30 過去隔離商場食晚飯
