< Day 2 >
原來小朋友就算去旅行, 都係唔可以早起身. 起得身刷牙洗臉, 都已經係9:30, 食埋早餐, 已經係10:30. 由於酒店唔包早餐, 本身諗住出去食, 但由於亞囡要求再encore夏威夷帕尼尼, 所以又再次係咖啡店食早餐.
食飽之後就出發去格上租車取車. 一家大細, 當然係坐的士去啦, 都係幾十蚊, 唔駛去捷運站左轉右轉. 取車之後, 就向今日嘅景點出發…. 去邊? 一陣你咪知囉.
今晚會係宜蘭落腳, 所以計劃行程中, 就有了呢個 planning.
本身由台北去宜蘭, 行雪山隧道, 只係需時1小時左右. 但係我計劃中係要繞遠路… 上山, 落山…. 無錯, 我計劃就係去猴硐, 十份, 菁桐, 然後最後先到宜蘭. 反正都係自駕遊, 點解唔去多啲途中景點呢?
由於開頭唔習慣睇GPS導航, 搞到行錯幾次路, 排除萬難之後, 原本應該50分鐘車程, 最後變成1個鐘頭30分鐘… 到達猴硐, 影一陣相, 就去搵飯食. 猴硐呢個地方, 食飯地方唔多, 來來去去都係幾間古早麵店, 求其搵一間食飽飽就繼續影下相, 買下紀念品… 本身都想去貓村睇睇, 但見到條樓梯, 我要抱住BB車加妹梅的話, 我就話不如出發去下個景點啦, 因為時候都唔早了. 原本猴硐都只係計劃一個鐘左右就走, 而家都成兩個鐘, 都係時候出發去十份了.
經過一輪又上山, 又落山, 終於到了十份…. 經過一條大街之後, 就到達了十份老街了… 整條街都係人, 係香港人…. 個個都係度放天燈, 係鐵路軌影相.. 由於放天燈會破壞自然生態, 我們就沒有放了, 趁人放天燈我們就影相, 同其他人一樣, 坐係鐵路軌影相, 又去買明信片寄返香港.
十份另一個特色景點就係…. 條鐵路軌真係會有火車駛過. 當你坐係鐵路軌影緊相, 係鐵路軌放緊天燈, 會突然有人吹哨子, 大叫 – 有火車呀…. 然後所有人就會向兩旁走, 清空返條路軌, 而火車就會好緩慢咁係你身邊經過. 當然係呢個時候, 就會有好多人係旁邊同架火車影相啦… 都幾得意.
估唔到, 喺十份居然都遊咗三個鐘, 所以最後菁桐就放棄了, 無去到.. 唯有等下次先再去啦.. 原來不經不覺已經6點30分了, 我們就出發往宜蘭 – 優的民宿…
經過差不多一個多小時車程, 終於到達民宿了. 經過一輪執拾, 阿囡就去玩電動車. 到了晚上8點15分, 又係時候要去醫肚… 宜蘭最出名夜市叫羅東夜市, 當然就要去呢個地方搵食啦.
去到夜市附近, 找了一個停車場泊車. 準備入去泊車時候, 突然我停住, 如果停車場要用類似八達通咭入閘, 我點入呢? 所以派了探子去查探… 好彩, 原來都仲係拎票, 再去閘口比錢.
係夜市隨便找了一檔吃飯, 吃小食, 又買了一杯鳳梨檸檬汁, 真係好好飲.
原來一日好快過, 咁就一日, 返民宿休息..
10:00 Check out 食早餐
11:00 到格上取車
11:30 開車出發往猴硐
13:00 到達猴硐
14:55 開車前往十份
15:30 到達十份
18:30 開車出發前往宜蘭優的民宿
19:40 到達優的民宿 Check in
20:10 出發去羅東夜市食晚飯
22:00 回民宿休息
封面圖片取材自臺北旅遊網