Skip to content

台北宜蘭復活之旅 (2017-April-12)

<Day 5>

瞓醒, 當然先係旅樹再食一個好豐富的早餐, 然後就出發前往今日唯一一個要去的景點, 無錯, 係唯一一個節目, 就係……..國立傳統藝術中心.

因為上網睇過其他blog, 好多人都話要用一日時間, 或者點都要大半日時間, 加埋睇過幾個blog資料, 所以就編排了一日喺呢度. 不過可能亞囡會覺得悶, 因為呢度係俾大人去懷舊一番的.

好啦, 出發, 好感謝太陽伯伯, 亦好多謝雨小姐, 實在太配合. 晚上落完一場雨之後, 整日都無再落雨. 天氣仲有點清涼, 要著返件外套添.

其實國立傳統藝術中心, 佢主要係由一條紅磚砌出來的舊時商店街組成. 裡面有各式各樣商店, 都係以傳統懷舊為主題. 好似有懷舊麥芽糖餅, 懷舊糖葱餅, 懷舊照相館, 懷舊油紙傘…… 實在太多太多. 差不多每間舖我們都有入去睇睇. 不經不覺, 又到食中午飯時間, 裡面其實飯店選擇唔太多, 不過都係有特色, 我們最終選了火車便當作為午飯. 食物水準就……. 填飽肚就算啦. 始終係遊客區, 你明白的… 哈哈哈…….

行到攰,走去飲杯咖啡抖下

食飽之後, 當然係繼續行啦, 因為都未行晒. 其實來來去去都係逛商店, 行到攰就搵間shop 食cake, 飲咖啡, 然後又再行過, 行行行行行…. 咁行法, 咁睇法, 始終都要喺呢個地方失手…………

1. 茶杯 x 4 (俗稱自私杯)
2. 陶笛
3. 毛筆帖
4. 太多太多…..

去到接近黃昏, 我們就去了湖畔, 欣賞一下呢度比較特別的燈籠魚…. 唔講唔知, 條燈籠魚喺湖畔旁係有原因的. 因為當燈籠著了, 黃昏天色暗了, 就會在湖水中有了倒影, 勾劃出一整條魚, 真係…. 邊個諗呢個主意出來???

自拍完, 已經聽到廣播要關園了… 然後就係諗下一站!! (謎之聲音: 喂, 你唔係話今日得一個節目咩?) 係, 真係得一個節目, 但係呢個下一站係即興的, 就係老婆大人話咁多日, 都未食過台灣牛肉麵, 咁唔算來過台灣喎…. 本身行程又係去羅東夜市搵食, 而家唯有即時上網睇, 搵一搵宜蘭有邊間牛肉麵比較出名..

隨便一search, 數十間牛肉麵店, 真係睇到眼花. 最後, 我選了一間叫做傅家飽牛肉麵館, set好導航, 再核對地址, 無錯了, 出發.

其實呢間牛肉麵店真係好唔起眼, 客人又唔多, 又早收工 (九點). 我們到達時應該係七點半左右, 但係店裡面已經無人, 莫非台灣人真係咁早食飯? 我們食到差不多九點, 老闆已經在執拾, 清潔舖面了. 講返食物質素先, 好食… 真係好食. 個湯好濃, 好好味… 總之我連湯都飲埋. 食麵時仲有和老闆傾計. 當然老闆梗係讚自己足料, 用好多料來熬湯底, 所以先會咁好味…

食飽飽, 開車回民宿, 咁啱經過生果店, 又走去買芭樂食…..


09:00 食早餐
11:30 到達國立傳統藝術中心
13:30 食午飯, 鐵路便當
18:30 返民宿小休一下
19:30 食晚飯, 傳家飽牛肉麵


早餐係好重要的,記住。所以一間好嘅民宿,都要有好嘅早餐,呢間不錯。可惜外面落微微雨,如果天氣好,應該坐出外面,對住個無敵大花園食,咁就正! 

民宿大部份早餐都會好傳統
啲粥真係軟綿綿,好好味
旅樹民宿
對出一大片湖
國立傳統藝術中心
園區地圖
特式商店
其實即係老街構成的購物中心
味道就…… 普普通通啦
燈籠魚
正,真係連湯都會飲埋
Published in周遊列國

Be First to Comment

Leave a Reply

This site uses Akismet to reduce spam. Learn how your comment data is processed.