記得早排電視重播周星馳o既行運條龍, 劇情唔知大家記唔記得. 唔記得都唔緊要, 最緊要記得戲入面有幕係講蛋撻由整模, 倒蛋漿到焗成一隻隻金黃色o既出爐蛋撻, 真係睇見都想即刻整返一件嘆下.
於是o個日就同 Victo & Amy 係元朗周圍搵, 睇下有無一間茶餐廳係有奶茶再加多件蛋撻, 坐係度慢慢嘆. 腦海中即時浮現國際茶餐廳, 可惜, 國際o既蛋撻已經賣晒, 唔會再有蛋撻出. 其實都有其他餐廳, 可惜o個 D 餐廳o既蛋撻唔係自家制, 而且通常都係由朝放到晚, 唔會係新鮮出爐, 所以最後只係食o左個普通o既茶餐… 原來而家元朗係無o左呢 D 咁有特色o既茶餐廳.
反而長沙灣就仲有間, 真係每日都出爐蛋撻同埋麵包, 而且仲係舊色茶餐廳添… 真係食起上o黎好有風味!! 呢間位於長沙灣o既茶餐廳叫做新華, 大家可以去試下, 正!!
但係估唔到, 今日過海做o野, 居然無意中比我發現到一間茶餐廳, 佢係有自家制麵包, 蛋撻, 仲要比我見到佢係剛剛新鮮熱辣出爐, 我上次食唔到, 無理由今次會放過呢個咁難得o既機會o架!! 於是二話不說, 走入去, 搵位坐低, 然後 order o左蛋撻同埋奶茶…. 正, 真係無得頂!!! 一個人, 如果想食o個樣o野, 而你又可以食得到, o個種幸福感, 真係……. 正到爆!!
雖然呢間o野水準都可以, 但比起新華, 真係差o左D, 不過唔緊要, 呢次都係過下口癮, 下次返去新華再嘆過!! 
圖片取材自 ivyleeou.blogspot.com