Skip to content

Transformers 變形金剛

今日好熱鬧, 一行十四人, 有我, Victo, Albert, Irise, Eric, Yada, Thomas, Christina, Hong, Catherine, Russell, Jessica, Sam, Ming 一齊去睇變形金剛.   真係未試過約埋咁大班人一齊睇戲, 好難得!!

其實呢個活動, 早係一個月前已經發起, 希望搞o的活動, 增加大家員工對公司o既歸屬感.  不過估唔到, 真係有咁多人支持, 真係開心!!  今次我o地揀選o左尖沙咀海運戲院o黎睇, 一來呢間戲院o既環境唔錯, 音響不過不失, 二來貪佢係市區, 夜晚近我o地食飯o既地方, 三來食完飯返屋企, 尖沙咀返邊度都咁方便.

講返套戲, 真係無諗過會咁好睇! 本身都只係諗住打打打, 玩下特技, 睇下而家o的特技有幾咁令人嘆為觀止.  純粹係為視覺上, 觀能上提供娛樂, 刺激.  反而內容都無乜點去理.  但係點知, 原來內容都唔差.  內容當然係圍繞博派同狂派之間o既戰鬥, 大賣特技 (真係只可以講: 勁).  當然唔少得男女主角o既愛情啦, 同時亦有人與機械人o既友情, 但最令我估唔到o既係呢套戲入面, 除o左提供緊張刺激之外, 佢亦都有好多笑位 (真係好輕鬆惹笑). 而劇中o既機械人表現得好有感情, 好人性, 令你覺得佢根本就係一個人, 唔係機械人.  亦估唔到美國人可以諗到將o的咁o既動作融入去機械人度, 比佢o地去演譯.  真係別有一番風味.  唔講咁多啦, 我驚我會講到唔停口.  

總結一下先.  全片由坐低到散場, 絕無冷場, 亦無厠所位比你去, 足足成兩個半鐘, 70蚊張票, 真係好抵, 值回票價.  大家未睇o既, 真係要去睇.  包你話正!

Published in影音天地

Be First to Comment

Leave a Reply