Day 5, 今日台北天氣預報話會落雨，原本打算再去猴桐探貓貓, 不過驚落雨, 所以今日就改為去行下街，唔去貓貓村。咁啱阿太有個朋友都嚟咗台北，見到佢post咗個好正嘅地方，有嘢食, 有嘢睇, 咁就梗係跟住去啦！ 首先係旅館食咗個靚靚早餐, 當然係食我最愛嘅帕尼尼早餐, 阿太就食台灣粥, 食飽就出發. 原來個地方就係中山站，跟我原來計劃嘅第一天某個景點（赤峰街）好近。嗰度係一啲好文青嘅地方，好多cafe店，好多飾物店，書店。。。而附近就係台北光點，真係好文青。只係一出捷運站, 我哋已經被四周商店吸引住, 無啦啦被一間賣傻豹嘅舖頭吸咗入去, 仲要失手買咗好多嘢… 真係此地不宜久留, 即刻去嗰間家具店先，去到當然睇下家品啦，然後。。。。。又係食食食，佢嘅鐵鍋鬆餅真係好好味，甜品又好正，最正係佢嘅奶茶，奶茶控應該幾鍾意。赤鋒街由幾條巷組成，不同店舖, 不同喫茶店, cafe, […]
Day 4, 酒店 check out, 然後拖住行李去桔梗三明治嘆一個美味早餐. 連續兩日都食三明治? 放心, 呢度有其他歐陸早餐食的, 不過又食三明治做早餐又有乜問題呢? 哈哈哈.. 呢間舖喺條橫街, 所以環境都算清靜, 裡面裝修又有啲書卷味, 又有啲歐洲味, 感覺舒服. 而今日嘅重頭戲就係去 KidsAwesome奧森兒童博物館畀小朋友放電. 呢度就喺我哋今晚入住旅館嘅後面, 所以都好方便.
Day3, 噚晚 google 一下附近有沒有美味的早餐, 因為老婆喜歡食三明治, 所以搜尋主題都係三明治為主. 搵搵下, 發現酒店附近又有一間好味道嘅三明治店, 叫做早餐研究所. 第二朝一早去, 點知…. 是日休息!! 好彩, 係附近繞一圈, 發現原來附近又有一間專門做三文治嘅早餐店, 叫做早安日和. 兩個字, 好正…. 估唔到食唔到嗰間, 食到呢間,
Day 2 六福村主題遊樂園 小孩放電嘅好地方，不過距離台北比較遠。而且巴士班次成三十分鐘先一班，真係要預多少少時間。遇著多人去，分分鐘要等幾班車（台聯5350）先上到，咁就會失晒預算。今次我都要第二班車先剛剛上到。放咗成日電，夜晚去咗食海鮮打邊爐，超豪的一餐，下次不會。
又嚟，又嚟。。。真係要每年都嚟探親一次？返老家都無咁密。 今日去到台北都已經兩點幾, 所以去酒店放低行李就即刻出去搵嘢食. 原本第一日預計用半日去赤峰街行下食下嘢, 但係唔知搞乜, 搞到咁晏先去到酒店, 所以即刻改變行程. 即用 google map search 一下. 咦, 原來酒店附近有一間姆名餐廳喎… 拿拿臨行過去, 等咗一陣有位就入去食. 成間餐廳真係不錯, 放咗好多隻大型公仔係座位上, 畀啲客人不停咁影相, 啲公仔就好似陪客咁坐係你隔離同你食飯,
新年流流，晨咁早，搵啲咁嘅嘢嚟搞。。。頂!! >_<好彩無乜嘢，只係花咗小小。都唔知條友係咪飲醉，成塊面紅色。開車就打醒十二分精神，唔好分心。搞到我送唔到蘇菲返學，唔該晒一媽幫手。。 圖片取材自 www.moneyhero.com.hk
一連七日嘅台北之旅要劃上句號了，真係好喜歡台灣。要再儲多啲彈藥，下年再嚟過。 畀你哋參考下我嘅路線，你哋如果計劃嚟台北，都可以參考下。 第一天香港 – 台北桃園機場 – 台北車站 (食午飯) – 新北投老爺酒店 (放低行李) – 閒逛北投公園 – 北投兒童樂園 (瀡石滑梯) – 粟家牛肉麵 – 返酒店瞓覺
唔知係咪近排經歷太多唔好嘅事，尤其經過媽子過身，婆婆做完手術後有啲影響要再入院，依家蘇菲又因為肚痛而要入院，太多太多唔好嘅事發生，真係會變得情緒低落。 之前好多工作，幾煩嘅人同事，都唔會令我感覺煩，令我感覺痛，再煩嘅工作，只要努力，總會出現曙光，總有希望。 但原來家人嘅身體出現問題，就算自己幾努力，睇幾多資料，都係無用。只有搵醫生，等醫生嘅診斷，好無力，好無助。而且醫生有時都未必幫到你，但係你唔靠佢，仲可以靠邊個？親人嘅離世，真係好痛。屋企人嘅身體不適，亦會令你痛，呢種痛，真係非筆墨所能形容。 希望婆婆同蘇菲快啲好返，返嚟屋企，大家開開心心過生活。 圖片取材自 62icon.com (by CHAMPION)
和合石火葬場，N咁多年無嚟過。估唔到今次嚟到，感覺煥然一新，新裝修過，好有時代感。講得再好啲，豪宅都係咁嘅氣派。 我哋可以係呢度送媽子最後一程，感覺都輕鬆啲。希望媽子都會覺得呢度環境好，設施好，走都走得安樂，安心。 今日終於都流下男兒淚，係瞻仰遺容嘅時候，真係會諗返好多細個嘅嘢，媽子您點打我，點鬧我，又點愛錫我，好多好多回憶，而最後深感內疚嘅係自己無同您出過國旅行，亦原來無乜點影合照，亦無好好咁孝順您，以前仲成日激您，真係好對唔住。不過我諗您都唔會嬲我嘅，因為您係我媽子，我係您個仔嘛。媽子，我會儘量多啲返屋企搵老豆食飯飲茶㗎啦！您放心啦！ 7-Oct-2017 自 圖片取材自 m.21zx.net
媽子，今日好多人嚟咗送您最後一程，證明您人緣好好呀，您啲仔仔女女，孫仔，孫女，外孫仔，外孫女都嚟晒，福氣，福氣。您唔駛掛心，個個都會生性，個個都會孝順，個個都會睇住老豆，照顧好老豆。您就去玩下，輕鬆下，鍾意去邊玩就去邊啦! 聽日就送您上山，一路好走!! 6-Oct-2017